Valmynd Gerast meðlimur

Markaðsverðlaun 2015

Markaðsmaður ársins

Andri Þór Guðmundsson, forstjóri Ölgerðar Egils Skallagrímssonar, var kjörinn Markaðsmaður ársins 2015 við hátíðlega athöfn í Ásmundarsafni fimmtudaginn 26. nóvember. Verðlaunin eru veitt þeim einstaklingi sem þykir hafa sýnt framúrskarandi árangur í markaðsstarfi á líðandi ári. 
Birna Einarsdóttir, bankastjóri Íslandsbanka tilkynnti úrslitin en hún var kjörin Markaðsmaður ársins 2014. 

Í rökstuðningi dómnefndar segir að Andri Þór hafi náð miklum árangri með vörumerki Ölgerðar Egils Skallagrímssonar, sem flest hver hafa verið að auka hlutdeild á markaði þar sem samkeppni er hörð og framboð mikið. Andri Þór hefur verið leiðandi í vöruþróun á drykkjarmarkaði og hefur hann meðal annars haft það að markmiði að stuðla að aukinni bjór-og vínmenningu meðal þjóðarinnar með stofnun Gestastofu, Borg Brugghúss og Bjórskólans, þar sem almenningi hefur gefist kostur á að fá fræðslu um íslenskan bjór, þar sem að gæði eru tekin umfram magn.

Dómnefnd

Í dómnefnd sátu:

  • Birna Einarsdóttir, bankastjóri Íslandsbanka
  • Einar Einarsson, framkvæmdastjóri Gallup
  • Andrés Jónsson, eigandi og stofnandi Góðra samskipta
  • Bjarni Ólafsson, ritstjóri Viðskiptablaðsins
  • Hjalti Jónsson, framkvæmdastjóri Íslensku auglýsingastofunnar
  • Svanhildur Konráðsdóttir, sviðsstjóri Menningar-og ferðamálasviðs Reykjavíkurborgar
  • Valgeir Magnússon, framkvæmdastjóri Pipar/TBWA
  • Helga Valfells, framkvæmdastjóri Nýsköpunarsjóðs atvinnulífsins
  • Dr. Friðrik Larsen, lektor í HÍ og formaður stjórnar ÍMARK
  • Ásta Pétursdóttir, framkvæmdastjóri ÍMARK

Breytt form

Árið 2014 tók stjórn ÍMARK þá ákvörðun að breyta formi keppninnar um Markaðsverðlaun ÍMARK. Í stað þess að veita verðlaun fyrir bæði Markaðsmann og Markaðsfyrirtæki ársins, eins og hefur verið gert undanfarin ár, verða eingöngu veitt verðlaun fyrir Markaðsmann ársins árið 2015.  Árið 2016, er þá Markaðsfyrirtæki ársins valið og svo koll af kolli. Þessi breyting er gerð svo að fleiri fyrirtæki og einstaklingar geti komið til álita í hvert sinn sem verðlaunin eru veitt.