Valmynd Gerast meðlimur


12. júní

Morgunfundur ÍMARK: Er pé err markaðssetning?

Fullt var út úr dyrum á morgunfundi ÍMARK sem haldinn var fimmtudaginn 18.maí síðastliðinn í sal Orkuveitunnar. Fundarstjóri var Einar Ben, meðeigandi og framkvæmdastjóri Tjarnargötunnar og stjórnarmaður í ÍMARK.

Hvaða rými eiga almannatengsl að hafa í nútíma markaðssamskiptum? Hvað segja almannatenglar, fréttamenn, auglýsingastofufólk, viðskiptavinurinn og opinberir aðilar? Þessum spurningum og fleirum var velt upp á fundinum.

Þórunn Anna Árnadóttir, sviðsstjóri hjá Neytendastofu tók fyrir duldar auglýsingar á samfélagsmiðlum. Þórunn Anna var ein fjögurra fyrirlesara sem tóku til máls. Hún sagði misbrest á því að fyrirtæki merki auglýsingar nægilega vel. Oft á tíðum væri það hreinlega vegna þess að fyrirtæki þekki ekki reglurnar um merkingar á auglýsingum. Þá nefndi hún að Instagram væri miðill sem sé óskýr og þess heldur þurfi að merkja auglýsingar vel enda eigi neytendur alltaf rétt á því að vita hvað sé auglýsing og hvað ekki.

Aðrir fyrirlesarar voru Már Másson, yfirmaður markaðsmála hjá Bláa lóninu. Hann velti fyrir sér áhrifavöldum á samfélagsmiðlum og hvort slík nálgun eigi alltaf við. Már sagði gesti Bláa lónsins þeirra mikilvægustu áhrifavalda. Hann tók fram að áhrifavaldar á samfélagsmiðlum sem hafa gert sig gildandi á síðustu árin væru í raun einskonar vörukynningar á sterum. Fyrirtæki eigi að stíga varlega til jarðar þegar þau nýta áhrifavalda. Þá geti verið varasamt að setja vörumerki sitt í hendurnar á aðila sem hefur litla tengingu við það og þannig gæti vörumerkið og orðspori fyrirtækisins verið stefnt í hættu.

Kristján Hjálmarsson, viðskipta- og almannatengslastjóri hjá HN:Markaðssamskiptum talaði um stuðning PR við markaðsstarfið og að PR markaðssetning byggi að miklu leyti á góðri frétt eða góðri sögu. Kristján tók dæmi um undirskrift samnings á milli aðila þar sem í staðinn fyrir skrifborð og handsal var farið í troðslukeppni og rataði sú frétt í helstu fjölmiðla og sjónvarpsfréttir. Niðurstöður Kristjáns eru þær að vissulega skili PR árangri, slíkt sé ódýrara en auglýsingar og einnig verðmætara. PR sé ekki fullkomið frekar en vísindi en virkar frábærlega með auglýsingum.

Atli Fannar Bjarkarson, ritstjóri Nútímans tók síðastur til máls og fjallaði um ástar- og haturssamband pöggarans og fjölmiðla. Hann tók dæmi um sniðugar hugmyndir að umfjöllun eða plöggi og hvernig óhefðbundnar fréttir, s.s. ís sem bráðnar í gluggakistu, sniðugt snapchat og pizzugerðarkeppni fengið heilmikinn lestur. Almannatenglar verði að vera meðvitaðir um samhengi plöggsins og fjölmiðilsins og hvort viðkomandi frétt passi við fjölmiðilinn sem sent er á.

Sjá myndir frá morgunfundinum hér

Ásta Pétursdóttir